Tünevin Aqmescit-Keriç yolunıñ çetinde Eski Qırım rayonında büyük yük maşnaları sırağa turdı. Bu yerde tahminen yigirmi maşna toplanıp turdı.
«Krimavtodor» şirketinde bildirdiler ki, yüz bergen vaziyet aqqında haberleri bar. Belgilengenine köre, furalar yaz köpçeklerinen yüre. «Krimavtodor» şirketinde qayd ettiler ki, bu yolda gece-kündüz buznı yoq etken maddeler tökülmesi boyunca kerekli işler yapıla.
«Qalğan maşnalar yüre, bular ise, qış köpçekleri olmadan yürip, böyle vaziyetke oğradı. Er kes tüşüne ki, sanki Qırım – aman-aman Afrikadır», – dep bildirdi «Krimavtodor» teminlev bölüginiñ yolbaşçısı Maksim Miroşnik.
Avdetniñ evel bildirgenine köre, Aqyarda buzlavuq naqliye areketini sıñırladı. Şeer yollarında olğan kollaps yerli sakinlerni açuvlattı.
