Ekimlerniñ qabaatınen az qaldı vefat etecek olğan üç balanıñ anası Zalina Useinovağa 5 yıldan soñ tazminat berildi

07.12.201610:30

Bir kereden üç bala doğurğan Zalina Useinovanıñ davaları boyunca mahkeme toplaşuvları tek bir ay evel yekünlendi. Qadın, beş yıl evel loqsahane ekimleriniñ qabaatınen az qaldı ölecek edi.

Mahkeme 2 sanlı Aqmescit loqsahanesinden Zalina Useinovağa onıñ 01.01.2012 senesinden 30.01.2016 senesine qadar coyğan aylığını (529 biñ 707 ruble), maneviy zararnı (2 million 665 biñ 958 ruble), mahkeme masraflarını (38 biñ ruble) bermesini talap etti, dep bildire «Golos Krıma» neşri.

2011 senesi avgust ayında yerli kütleviy haber vastaları 30 yaşındaki Zalina Useinova birden üç bala doğğanınen bağlı vaziyetni aydınlata edi. Edem, Leniye ve Safiye adlı balaçıqlar dünyağa kelgen soñ, Zalinanıñ sağlığı yaramaylaştı, çoq qan coyğan soñ ve tibbiy yardım vaqtında berilmegeni sebebinden qadın komatoz alına tüşti.

O vaqıt qadınğa, soy-sop ve yaqınlarından ğayrı, onı bimegen insanlar da yardım etken edi.

Analıq quvançı yerine Zalinağa on kün devamında koma, eki ay devamında tedaviylenüv, saqatlıq ve taraftan yardımğa ihtiyac keldi.

Şimdiki vaqıtta Edem, Leniye ve Safiye beş yaşındalar. Olar sağlar, bala bağçasına qatnay. Zalina daa çoq vaqıt devamında tedaviylenüvden keçecektir.

Фото аватара

Автор: Редакция Avdet

Редакция AVDET