İçki (Sovetskoye) rayonı mekteplerinden biriniñ yaş ocası, Tavriya akademiyasınıñ slavân filologiya ve mühbircilik fakultetiniñ magistri Alime Mambetova «Ufuqqa adım at» («Şagni za gorizont») Cumhuriyet genç ocalar yarışınıñ birinci seviye laureatı oldı.
Yaş ocanıñ Avdetke bildirgenine köre, konkurs 2 turdan ibaret oldı.
Birinci, ğıyabiy basamaqta 23 yaşındaki Alime Mambetova «Mektepte teatr – muvafaqiyetke bir basamaqtır» leyhasını taqdim etip, eñ yahşı beş oca sırasına kirdi.
Alime Mambetovanıñ fikrince, mektepte hususan teatr faaliyeti – balanıñ umuminsan medeniyetine, halqınıñ ahlâq degerlerine yoludır.
Superfinalistlerniñ soñki yarışı dekabr 5-te Aqmescitteki 43 sanlı mektepte keçirildi.
Alime Fikretovna çalışqan Qaynaş (Krasnoflotskoye) mektebiniñ talebeleri ocağa faal qol tutıp, «Kelecekniñ mektebi» teatr sanalaştırmasını jürige taqdim etti.
«Ufuqqa adım at» yarışınıñ maqsadı – kreativ yaş ocalarnıñ belgilenmesi ve olarnıñ mütehassıslığı kelecekte inkişaf etmesi, bunen beraber, oca zenaatınıñ populârlaştırmasıdır.