«Yedinaya Rossiya» firqasınıñ azası qırımtatar deputatlarını Qara deñizge batırmağa teklif etti

14.12.20169:15

Aqmescit rayonındaki Aqtaçı Qıyat (Beloglinka) ve Saraylı Qıyat (Mirnoye) köyleriniñ kirişinde tarihiy adlar ile işaretlerni qoymağa teklif etken ve bu qararğa qol tutqan deputatlarnı Qara deñizge batırmağa çağırdılar.

Bunı Facebook içtimaiy ağında «Yedinaya Rossiya» firqasınıñ azası Natalya Krıjko, «Partiya rosta» firqasından Devlet Duması deputatlarına sabıq namzeti Aleksandr Talipov ve «Tavriya birligi» cemaat teşkilâtı reisiniñ sabıq muavini Liliya Didenko Qırım cemaatçıları arasındaki muzakerelerde körmek mümkün.

İşbu muzakereler, Krıjko Didenkonı köy kirişinde köyniñ qırımtatar adınen işaretni qoymaq «büyük hatanıñ» yapılmasına yol bermemege çağırğan beyanatı tübünde inkişaf etti.

kryzhko1

İzaatlar müellifleri ad deñiştirüvinde (böyle etip, olar işaretniñ qoyulmasını adlandırdı) Qırımtatar Milliy Meclisiniñ (Rusiyede 26.04.2016 mahkeme qararınen yasaq etilgen) elini kördi.

«Bellesem, bu fikirniñ vatanı hususan Perekopnıñ o bir tarafındadır… Bizim, ukrain gambitinden ğayrı, endi daa meclisniñki de peyda ola…» – dep ayttı Didenko.

Bunen beraber Krıjko evelden haber etti ki, ad deñiştirüviniñ teşebbüsçisi Saraylı Qıyat köy şurası deputatı Snaver Halilov ola.

Cemaatçı Talipov, öz nevbetinde, «bu deputatnı aynı yerge» yollamağa teklif etti, Krıjko ise, Halilov kibi deputatlar içün eşelon sımarlamağa teklif etti, çünki o, «yazıq ki, böyle bir özü degil».

Amma soñra «Yedinaya Rossiya» firqasınıñ azası, başqa türlü tüşüngenlerge qarşı küreşniñ diger usullarını teklif etti: «Böyle ise, barjanı, em de Qara deñizniñ eñ teren yerinde… ve olarnıñ tek betleri hatırada qala».

kryzhko

Aqmescit rayonındaki Aqtaçı Qıyat (Beloglinka) ve Saraylı Qıyat (Mirnoye) köylerinde yaşağan qırımtatarlarnıñ gruppası köylerge kirişlerde tarihiy adları – Ataş Qıyat ve Saraylı Qıyat – yazılğan levhaçıqlarnı qoymaq ricasınen köy şurasına muracaat etti. Sakinler muracaatnı Saraylı Qıyat köy şurasına berdi, işbu köyler bu şurağa kire. Köy şurası bu muracaatnı qanaatlendirmek qararını aldı. İşbu qarar ta oktâbr 17-de qabul etildi, amma halqqa tek bu künleri bildirildi.

Фото аватара

Автор: Редакция Avdet

Редакция AVDET