Rusiye Federatsiyasında qanuniy statusı soñuna qadar belli olmağan Qırım «Samooboronası» temsilcileri Şçolkinoda eki yerli sakinini yahşı etip kötekledi. Ücüm sebebi, zararlanğanlar saruş olğanı ve politsiyağa barmağa red etkenleri oldı.
Dava fotoresimlerini Odnoklassniki içtimaiy ağındaki «Lenino informatsion-eglence portalı» pabliginde qullanıcı Sergey Yakovenko paylaştı.
«Yigitler saruş edi, samooborona temsilcileri politsiyağa keçmek kerek olğanını ayrı bir şekilde añlattı, samooborona temsilcileriniñ körüngen yaraları yoq – körünmey, yigitlerden biriniñ betinde 6-dan ziyade ve başında 4 dane tikiş bar, diger yigitniñ agzını yırttılar – tikişler bar ve ilâhre», – dep yazdı Yakovenko.
Onıñ malümatına köre, adamlar mahkeme tibbiy ekspertizadan keçti, bunen beraber, samooborona temsilcileri tarafından üçüm ve köteklev aqqında politsiyağa ariza berdiler.
Videoda körüne ve eşitile ki, vaqia yüz bergen yerge kelgen politsiya hadimleri, qan gölçigi ve zararlanğanlardan biriniñ yırtılğan ağzına baqmadan, samooborona temsilcilerini (izaatlarğa köre, bu Şçolkino sakinleri de, amma olar kirgen «Samooborona» bölügidir, qaysı biri qomşu Yedi Quyu rayon merkezinde qayd etilgen) mesüliyetke celp etmege istemey.
«Men senden samooborona temsilcisini aldımmı? – dep bir qaç kere ayta politsiya hadimlerinden biri qan tökken aqay kişine. – Aldımmı? Saña daa ne kerek?» – dep bildire «Primeçaniya».
