Tünevin, dekabr 14-te qırımtatar faali, «fevral 26» işi boyunca yaqalanğan Ahtem Çiygoz 52 yaşını toldurdı. Bu kün onıñ evinde tahminen 80 musafir toplaştı.
Soy-sop, dostlar ve qırımtatar faalleri Çiygoznıñ esli-başlı ana-babasına ve apayına destek köstermege keldi. Dua etildi ve üyle aşı berildi. Ahtem Çiygoznıñ apayı Elmira Ablâlimova bu kün aqayını SİZO-da ziyaret etti.
İçtimaiy ağlarda da Ahtem Çiygozğa bağışlanğan çoq hayırlav bar.
Elmira Ablâlimova Facebook saifesinde Ahtem Çiygoznı hayırlağan ve destek köstergen er keske teşekkür bildirdi.
Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana.
