Sovet edebiyatı klassigi, qırımtatarlarnı batırmaq teklifini bildirgen cemaatçılarnı mahkemege celp etmege istey

15.12.201616:37
тимур пулат

Sovet edebiyatı klassigi, özbek ve rusiyeli nesirci Timur Pulat mahkemede «Yedinaya Rossiya» firqasınıñ azası Natalya Krıjko ve Qırım cemaatçısı Aleksandr Talipovğa qarşı cemaat qabaatlayıcısı olaraq çıqmağa istegenini bildirdi. Olar, Aqmescit civarındaki eki köyniñ tarihiy adlarını qaytamağa teklif etken deputatlarnı deñizge batırmağa çağırdı.

«Eger Qırımda qayd etilgen qırımtatarofoblarnı mahkemege celp etmege istegen adliyeci tapılsa, men cemaat qabaatlayıcısı olaraq hızmette buluna bilem, men keçken asırnıñ 80-ci senelerinden başlap, bugünki künge qadar qırımtatarofoblarnıñ ayıp areketleri boyunca bayağı malümat topladım», – dep yazdı Timur Pulat Facebook saifesinde.

Yazıcı qayd etti ki, Facebook içtimaiy ağında peyda olğan muzakereler iştirakçileriniñ yazğanları Rusiye Cinaiy kodeksiniñ 119 maddesiniñ sıñırlarına kire – qorquzma. Cinayetçiler apiske qapatıla ya da mecburiy işlerge celp etile bile.

Avdetniñ evel bildirgenine köre, Aqmescit rayonındaki Aqtaçı Qıyat (Beloglinka) ve Saraylı Qıyat (Mirnoye) köyleriniñ kirişinde tarihiy adlar ile işaretlerni qoymağa teklif etken ve bu qararğa qol tutqan deputatlarnı Qara deñizge batırmağa çağırdılar. Bunı Facebook içtimaiy ağında «Yedinaya Rossiya» firqasınıñ azası Natalya Krıjko, «Partiya rosta» firqasından Devlet Duması deputatlarına sabıq namzeti Aleksandr Talipov ve «Tavriya birligi» cemaat teşkilâtı reisiniñ sabıq muavini Liliya Didenko Qırım cemaatçıları arasındaki muzakerelerde körmek mümkün.

Фото аватара

Автор: Редакция Avdet

Редакция AVDET