Aqmescit sakinlerine şahsiy arabalarnen yolğa çıqmamağa rica eteler

16.12.201614:12

Aqmescit şeer memuriyeti avanıñ kerginleşkeni sebebinden şeer soqaqlarında 13 mahsus münitsipal ve 11 bu işke celp etilgen teşkilâtlarnıñ tehnikiy vastaları çalışqanı aqqında haber ete.

Bu aqta malümat Qırım paytahtınıñ resmiy saytında yerleştirildi.

«Bu vaqıtqa qadar mahsus tehnikiy vastalar yedi marşrut boyunca beş kere keçip, yollarnı temizlep, buzlavuqqa qarşı mahsus qarışmanen sepip çıqtılar. Birinci nevbette duraqlar, yoquş ve tüşüv yerler baqıla»,- dep bildirdi matbuat hızmeti saba saat 9-ğa yaqın.

Şeer memuriyeti bildirgenine köre, yollarnı sepip çıqmaq içün endi 280 tonna tuznen qum qarışması işletilgen. Qaldırımlar, evler arasındaki keçitlerni 426 azbar hızmetçileri temizlep, tayğaqqa qarşı mahsus qarıştırmanen sepeler.

«Avanıñ kerginleşkeni sebebinden, Aqmescit memuriyeti şeer sakinleri ve musafirlerge muracaat etip, şahsiy maşnalarnen yolğa çıqmamağa ve mahsus tehnikiy vastalarnıñ işine keder etmemek içün, arabalarnı yol kenarında qaldırmamağa rica ete», — denile matbuat hızmetiniñ beyanatında.

Gidromerkez ve şeer hızmetiniñ «1563» Yekâne nevbetçi dispetçer hızmeti bildirgenine köre, gece Aqmescitte 16 mm qar yağıp, şimal-şarqiy yelniñ suratı küçleşken. Kün devamında avanıñ arareti -8-10 gradusqa qadar tüşecegi, küçlü qarnıñ yağması ise sekinleşecegi beklenile.

Фото аватара

Автор: Редакция Avdet

Редакция AVDET