Suvuqqa baqmadan, qırımlılar «Qırım memleketi» kitabınıñ taqdimnamesine toplandılar

17.12.201622:22

Bugün, dekabrniñ 17-de, «Güzel» etnografiya merkezinde Öleksa Gayvoronskiyniñ müellifliginde «Qırım memleketi» kitabınıñ üçünci taqdimnamesi ötkerildi. Avanıñ suvuq olğanına baqmadan, adamlar Qırımnıñ çeşit köşelerinden tedbirge keldiler.

«Yollar taygaq, qar ve suvuq olğanına baqmadan (adamlar başqa şeerlerden de keldiler), tedbirge biz beklegen ÖZÜMİZNİÑ adamlar teşrif buyurdılar. Bu endi üçünci taqdim merasimi olsa da, er bir merasim başqaca keçe. Aqmescitte «Fes» merkezindeki merasim – asılzadelerniñ toplaşuvını añdırdı. Kezlevdeki «Odun bazar» qapusında sanki evde, tögerek masa etrafında güzel, sıcaq müitte vaqıt keçirdik. Bugünki Bağçasaraydaki toplaşuv ise maña eski zamanlarını añdırdı», — dep yazdı Öleksa Gayvoronskiy özüniñ Facebook saifesinde.

Qırımnıñ yüregi olğan Bağçasaray şeerine kitapnıñ bayağı qısmı bağışlandı, çünki tamam hanlar paytahtında çoqusı tarihiy abideler saqlanıp qaldı.

Kitapnıñ müellifi ve leyhanıñ yolbaşçısı Naciye Femige qırımtatar milliy areketiniñ faal iştirakçisi Nariman Celâl, Qaradeniz Production studiyasınıñ baş müdiri Elzara İslâmova tebriklev ve minnetdarlıq sözlerinen muracaat ettiler, milliy areket veteranı Dilâra Seitveliyeva ise Öleksa Gayvoronskiyge çölmek eşyalarını bağışladı, bugün doğğan kününi qayd etken belli qırımtatar ressamı Zarema Trasinova ise, kitapnı körgen soñ ilhamlanıp yazğan resimini bağışladı.

Öleksa Gayvoronskiy «Qırım memleketi» kitabınıñ taqdimnamesi Qırımnıñ diger – eski Qırım, Qarasuvbazar, Sudaq kibi şeerlerinde ötkerile bilecegini qayd etti.

Avdet bildirgeni kibi, «Qırım memleketi» kitabınıñ birinci taqdimnamesi oktâbrniñ 21-de «Fes» art merkezinde ötkerildi.

Ekinci taqdimname noyabrniñ 10-da «Odun-bazar qapusı» medeniy-etnografiya merkezinde keçirildi.

Hatırlatamız, «Qırım memleketi» kitabı Aqmescitte derc etildi. Kitap 61 ilmiy-polpulâr oçerkten ibaret, müellif, hanlar devri tarihına ait olğan çeşit binalar aqqında tafsilâtlıca añlata.

Фото аватара

Автор: Редакция Avdet

Редакция AVDET