BMT Baş Assambleyası Qırımda insan aqlarınen bağlı vaziyet aqqında rezolütsiya içün rey berecek

19.12.201614:45

Dekabr 19-da, bazarertesi künü Birleşken Milletler Teşkilâtı (BMT) Baş Assambleyasınıñ umumiy toplaşuvında «Qırım Muhtar Cumhuriyeti ve Aqyar şeerinde (Ukraina) insan aqları saasında vaziyet» rezolütsiyasınıñ qabul etilmesi boyunca rey berüv keçirilecek.

Toplaşuv Moskva vaqtınen saat 18:00-de başlanacaq.

Noyabr 15-te BMT Baş Assambleyasınıñ esas Komitetleriniñ biri – İçtimaiy, gumanitar meseleler ve medeniyet meseleleri boyunca Komitet «Qırım Muhtar Cumhuriyeti ve Aqyar şeerinde (Ukraina) insan aqları saasında vaziyet» rezolütsiya leyhasını qabul etti. Vesiqanıñ qabul etilmesi içün 73 devlet rey berdi.

Vesiqa, Rusiyeden Qırımda insan aqları bozulmasını toqtatmağa, hususan yaqalanğan qırımtatarlarnı azat etmege, bunen beraber, Qırımtatar Milliy Meclisiniñ ekstremistik teşkilâtı olaraq tanılması aqqında qararnı lâğu etmege talap ete.

Rezolütsiya müellifleri BMT Baş kâtibinden Qırımğa insan aqları boyunca halqara nezaret etüv missiyalarına havfsız ve maniasız kirişni teminlemesini rica ete.

Bu qararnıñ müellifleri sırasına 32 devletniñ, bu cümleden, Amerika Qoşma Ştatlarınıñ, eyyetleri kire.

Фото аватара

Автор: Редакция Avdet

Редакция AVDET