Şimaliy-Qırım kanalından balanı qurtardılar (FOTO)

19.12.201615:40

Dekabr 18-de, bazar künü Krasnoperekopsk şeerinde bala Şimaliy-Qırım kanalınıñ şlüzları arasında qaldı.

Fevqulade vaziyetler nazirligi Qırım idaresiniñ malümatına binaen, 13 yaşındaki bala köpürden kanal suvunda peyda olğan buzğa çıqtı. Amma buz pek ince edi, patlamağa başladı. Bala, qorqup, buz üstünde kanalnıñ köprüne qaytmadı, amma şlüz ve suv arasındaki platformağa sekirdi. O yerden öz küçünen çıqıp olamadı, çünki bir taraftan platformanıñ yüksek divarı, diger taraftan ise, patlağan buz bar edi.

Qırım qurtarıcıları balanı yip vastasınen çıqardı. O, tibbiy yardımğa muhtac degil edi. Qurtarıcılar balanı evge alıp ketirdi.

«Rusiye Fevqulade vaziyetler nazirligi qurtarıcıları Qırım yarımadasınıñ bütün sakinleri ve musafirlerine muracaat ete: havfsızlıq qaidelerini bozmañız ve bunı balalarıñızğa ögretiñiz. Hususan, buz telükesine diqqat etiñiz», − dep çağırdı FVZ hadimleri.

mchs1

Фото аватара

Автор: Редакция Avdet

Редакция AVDET