Kezlevde (Yevpatoriya) «Odun bazar qapusı» müzeyiniñ qavehanesinde 23 yaşındaki ressam Elzara Kursaitovanıñ sergisi açıldı.
Bu, yaş ressamnıñ, Qırım müendislik ve pedagogika universitetiniñ dekorativ-ameliy sanat kafedrasınıñ mezunınıñ ilk şahsiy sergisi ola. Sergide 11 resim taqdim etildi.
«Ömür boyu oyun», 2015 s.
Merasimge şeer sakinleri, icat erbapları ve etnokompleksniñ musafirleri buyurdı.
Musafirler müellifniñ resimleri original, yengil ve milliy üslüpte yapılğanını qayd etti.
Bundan da ğayrı, Elzara Kursaitova yaş qırımtatar yazıcılarınıñ ikâyeleri içün, hususan Avdet gazetası neşir etken ikayeler içün, resimler azırlay.
Ressamnıñ sözlerine köre, o, daa qıdıruv basamağında buluna, onıñ içün çeşit üslüplerni ögrenmek, bir birine qoşmaq ve yapıp baqmaq meraqlıdır.
«Şimdiki vaqıtta dekorativ ressamlıq göñlüme daa yaqın, mevzularımnıñ çoqusı milliydir: natürmort, mimarcılıq ya da süjet kompozitsiyaları, olarnıñ içinde mıtlaqa bir mana bardır», – dep añlattı Elzara Avdetke.
Sergini teşkil etmek teşebbüsini «Odun bazar qapusı» etnokompleksiniñ reberi Dilâra Yakubova bildirdi.
Elzara Kursaitova Canköyde doğdı. 2016 senesi Qırım müendislik ve pedagogika universitetini bitirdi. 2015 senesinden başlap, «Rusiye ressamları birligi» Bütün Rusiye icat cemaat teşkilâtınıñ azası ola.
«İlham perisiniñ cazibeli dünyası», 2013 s.
«Ömür boyu», 2016 s.
Ressamnıñ icadı aqqında tafsilâtlı malümatnı Avdet gazetasınıñ nevbetteki sanlarında oquñız.