58 yaşındaki Bahtiyar Caparov çağına yetmegen eki oğlunı – 15 yaşındaki Bekir ve 12 yaşındaki Temurnı – bir özü östüre. Olar, pek ağır şaraitte yaşay. Vaziyetni balalarnıñ anası daa beter yaptı, o, qorantasını taşladı ve diger aqayğa ketti.
Qoranta Curçı (Pervomayskoye) köyünde umumiy evde ayrı kiriş ile yaşay. Aile evni soba vastasınen qızdıra. Qoranta başı resmiy olaraq çalışmay, çünki onıñ qayd etüvi yoqtır. Aileniñ esas qazançı – anda-mında tapılğan iştir. Böyleliknen, bir ay içinde bir qaç biñ ruble qazanıla, para zornen aşqa yete.
Bahtiyar Caparovnıñ apayı ve balalarnıñ anası yarım yıl evel qorantanı terk etti. Yaqınlarnıñ sözlerine binaen, qadın, başqa aqayğa ketkeni içün qorantanı taşladı, balalar bunı bile. Büyük oğlu Bekir ayttı ki, anasına işanmay ve onıñ qaytacağına ümüt beslemey. Kiçigi ise, Temur, aksine, anasız pek qıynala, onıñ qaytacağını istey.
«Men onıñ qaytacağını pek isteyim. Men sağınam da, bazı da ağlayım», – dep ayttı bala.
Bahtiyar Caparov qadından nefaqa almaq içün mahkemege ariza berdi. Mahkeme qadınnı balalar çağına yetecegine qadar er ay qazanğan aylığından üçte bir qısmını ödetmek qararını aldı. Amma üç ay devamında qadın bir kapık bile tölemedi, çünki resmiy olaraq bir yerde çalışmay.
«Amma ağır ayatqa baqmadan, olarnıñ yüzlerinde daima tebessüm bar. Qoranta azaları pek muabbet ve bir-birine yardım ete», – dep aytıla Crimeantatars.org süjetinde.
