Qırımtatar faali İlmi Umerov Maliye monitoring boyunca Federal hızmetiniñ saytında yerleştirilgen terroristler ve eksremistler cedveline kirsetildi. İşbu cedvelde o, 5826 sanı ile belgilengen.
Bunen beraber, qırımtatar milliy areketi iştirakçisine qarşı açılğan ekstremizm aqqında dava boyunca taqiqat daa devam ete.
«2016 senesi mayıs ayında maña qarşı «ekstremizm» maddesi boyunca uydurılğan cinaiy iş açıldı, şimdilik taqiqat devam ete, vesiqalar mahkemege daa teslim etilmedi» –dep yazdı İlmi Umerov Facebook saifesinde.
İlmi Umerovnıñ yañı «statusı» oña, bu cümleden, bank hızmetlerini qullanmaq imkânını qapata. Bunı o, bankta cöremeni tölemege tırışqan vaqıtta añladı, bu cöremenen o, 2016 senesi aprel 26-da Rusiyede yasaq etilgen Qırımtatar Milliy Meclisiniñ toplaşuvında iştirak etkeni içün cezalandı.
«Bank hadimleri, reberiyetnen tevsiyeleşip, afu sorap, maña añlattı ki, er angi bank ameliyatlarını menim adımdan yapmaq imkânsızdır, çünki İlmi Umerov programmada «EKSTREMİST» olaraq blok etilgen», – dep añlattı o.
Bunen beraber, İlmi Umerov yanvar 9-ğa qadar tölenmesi kerek olğan cöremeni nasıl etip tölemege bilmey.
