Qırım cemaatçısı ilân etti ki, Remzi İlyasov ükümetniñ közünden çıqtı

05.01.201711:15

Yarımadada «Qırım» cemaat areketiniñ faalleri rusiyeli ükümet organlarında yolbaşçılıq vazifelerinden boşatıla.

Bu aqta Qırım cemaat erbabı Lenur Usmanov bildirdi.

«Şimdi biz «Qırım» areketi yetekçisi Remzi İlyasov tarafından teklif etilgen adamlarnıñ Qırımda yolbaşçılıq vazifelerinden boşatılğanını köremiz. Aqmescit memuriyeti yolbaşçısınıñ muavini Teyfuk Gafarov, Qarasuvbazar rayonı memuriyetinde milletlerara munasebetler ve vatanına qaytqan vatandaşlarnıñ teminlenmesi saasında yolbaşçılıq etken Murat Yazıcıyev, sanki öz isteginen, vazifesinden boşatıldı. Aluştada da «Qırım» areketiniñ temsilcileri vazifelerinden boşatılğan. Bellesem, devamı olur», – dep bildire «Qırım.Aqiqat» Lenur Usmanovnıñ sözlerini.

Cemaat erbabınıñ malümatına binaen, Remzi İlyasov Qırımnıñ rusiyeli yolbaşçısı Sergey Aksönovnıñ közünden çıqtı.

«Remzi İlyasov, Qırım yolbaşçısına zıt kelip, özüni Rusiye Devlet Duması deputatlarına namzet olaraq teklif etken edi. Neticede yutquzdı. Aksönovnıñ planlaştırğanı kibi oldı – onıñ tarafından teklif etilgen Ruslan Balbek namzet, soñra da Devlet Duması deputatı oldı. Bundan soñ İlyasov ve onıñ tarafından teklif etilgen adamlar Aksönovnıñ közünden çıqtı», – dep qayd ete Usmanov.

«Qırım» qırımtatar halqınıñ regionlarara cemaat areketi» regionlarara cemaat teşkilâtı 2015 senesi aprel 29-da teşkil etildi.  Onıñ yolbaşçısı, Qırım Devlet şurası reisiniñ muavini Remzi İlyasov ola.

Rusiye tarafdarı Lenur Usmanov Qırım ve Aqyar cemaat erbabı, etnologiya ve milletlerara munasebetler bölüginiñ yolbaşçısı, Aqyar İlimler Akademiyasınıñ siyasiy eksperti ola.

Avdetniñ bildirgenine köre, dekabr 29-da Aqmescit memuriyeti yolbaşçısınıñ muavini Teyfuk Gafarov istifağa çıqqanı aqqında ilân etti.

Фото аватара

Автор: Редакция Avdet

Редакция AVDET