Qırımtatar faali açlıqnı toqtatqanını ilân etti

06.01.20179:20

Qırımdan sürgün etilip, narazılıq olaraq açlıq ilân etken Nedim Halilov öz küçünen bu aldan çıqmaq qararını aldı.

Bu aqta onıñ safdaşı Zevid Gaziyev bildirdi.

«Bunı becerir ve açlıq vastasınen narazılıqqa qaytmağa aceti olmaz, dep ümüt etemiz», – dep yazdı o Facebook saifesinde.

Açlıq alından, evel Halilov aytqanı kibi, hastahane şaraitinde çıqmaq kerek. Nedim Halilovnıñ alını nezaret etken faaller bildirdi ki, yanvar 3-te saba saat 10-da o, açlıqtan esini coydı. Tibbiy hadimler onı hastahanege alıp ketmekten vazgeçti ve kerekli areketlerni umumiy odada keçirdi.

Avdetniñ bildirgenine binaen, Nedim Halilov ilân etti ki, onı özüni öldürmege istegen alına ketirgenleri içün cinaiy iş açma aqqında Baş prokuraturağa ariza bermege niyetlengen.

Nedim Halilov, Qırım yarımadası territoriyasında 1986 senesinden başlap bulunıp, sürgünlikten avdet olunmaq aqqınıñ saibi Qırım yarımadasınıñ tamır halqı olaraq qırımtatarlarnıñ vaziyetini idare etken qaideler olmağan Anayasası olğan Ukrainanıñ vatandaşlığını almadı. Aynı sebepten Halilov rusiyeli vatandaşlıqnı da red etti.

Avdetniñ evel bildirgenine köre, Nedim Halilov Qırımdan mahkeme qararına binaen çıqarıldı. Sürgün sebebi, Sovet Birligi pasportı oldı. Başqa vesiqalarnı o red etti.

Soñra Nedim Halilov açlıqnı ilân etti. O, onı yarımadağa qaytarmasını, bunen beraber, oña milleti «qırımtatar» olğanı qayd etilgen vatandaşlıqsız şahıs statusı berilmesini talap ete. Bundan soñ o, onı psihiatrik hastahanege keçirmege istegenleri aqqında bildirdi.

Eki afta evel Nedim Halilov Rusiye prezidenti Vladimir Putinge mektüp ile muracaat etti.

Фото аватара

Автор: Редакция Avdet

Редакция AVDET