Yanvar 6-da belli qırımtatar cemaat ve siyaset erbabı Rustem Çiygoz 54 yaşını toldurır edi.
Rustem Çiygoz 1963 senesi Özbekistanda doğdı. Soñra Krasnodar ülkesinde Krımsk şeerinde orta mektepni bitirdi. 1980 senesi Harkov müendislik ve qurucılıq institutına kirdi, onı 1985 senesi alâ derecede yekünledi. O, qız ve eki oğulnıñ babası edi.
Vatanğa avdet yolunı Rustem Çiygoz ta studentlik vaqtından başladı. 1987 senesi Moskvada qırımtatarlarnıñ aktsiyalarında iştirak etken edi, milliy areketniñ faal iştirakçisi edi. 1989 senesi Rustem Çiygoz Qırımğa köçti, Bağçasaray rayonındaki Qalımtay (Tenistoye) köyünde qırımtatarlarnıñ toplu yaşağan ilk yeriniñ teşkil etilmesinde faal iştirak etti. Milliy öz-özüni idare etüv organlarınıñ tesisçilerinden biri edi. 1992 senesi ilk yerli meclislerden biriniñ yolbaşçısı oldı.
1994 senesi Rustem Çiygoz Bağçasaray rayon devlet memuriyeti yolbaşçısınıñ muavini oldı. O, sürgünlikten qaytqan soñ devlet hızmetine tayinlengen qırımtatar halqınıñ ilk temsilcilerinden biri oldı. Rustem Çiygoz Bağçasaray rayonında sürgün etilgen vatandaşlarnıñ teminlenmesi boyunca programmanıñ peyda oluvında iştirak etken edi, bundan da ğayrı, qırımtatar halqınıñ maarifi inkişafına büyük isse qoştı – onıñ teşebbüsi ile Bağçasaray rayonında bir qaç mektep ve mektepten aldın terbiyelev gruppası açıldı.
1996–1998 seneleri Rustem Çiygoz İsmail Gasprinskiyniñ 150 yıllığı qayd etilüvinen bağlı merasimler azırlavı boyunca iş gruppasınıñ yolbaşçısı edi. 2001 senesinden başlap ve vefat etkenine qadar Qırımtatar Qurultayı IV ve V-ci çağıruvınıñ delegatı edi. 2002 senesi Qırım iqtisat naziriniñ muavini vazifesine tayinlendi. O, Odessa regional devlet idaresi institutında oquy edi.
2010 senesi yanvar 3-te Rustem Çiygoz infarkt neticesinde vefat etti. O, babasınıñ vatanı olğan Bağçasaray rayonındaki Topçiköy (Dolinnoye) köyünde defin etildi.
Avdet gazetasınıñ muarririyeti Tatyana Moskalenkoğa malümat azırlavında yardım etkeni içün teşekkür bildire.
