Aqay kişi Aqyar akimiyeti binasınıñ penceresini qırdı

11.01.201710:10

Yanvar 9-da aqşam Aqyar sakini akimiyet binasınıñ pencerelerinden birini qırdı ve politsiya hadimleri tarafından yaqalandı.

Vaqia aqqında şeer gubernatorınıñ sabıq muavini Yevgeniy Dubovik Facebook saifesinde bildirdi, ve vaqianı «partizan cenkiniñ başlanuvı» dep adlandırdı.

«Yapqan areketini «uzaqtan kelgenler bezdirdi, bir şey yapmaylar, tek qan içeler» sözlerinen añlattı», – dep yazdı şeer gubernatorınıñ sabıq muavini, ve qayd etti ki, «Aqyar sakini neden o qadar açuvlanğanı aqqında tek türlü tahminler yapa bilemiz».

Şeer sakinleriniñ çoqusı cinayetçini takbih etti, amma bazıları aqay, kerçekten de, yerli akimiyetniñ keskin turğan meselelerge az diqqat ayırğanından qızğandır.

«Belki, bir-eki kere taylaq yolda yıqılğan, ve qızğandır», – dep tahmin ete Aqyar sakinleri.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET