Bugün saba Qırımnıñ Saq rayonında eki avtobus qarğa battı.
«Kezlev-Yalı Moynaq» («Yevpatoriya-Zaozernoye») marşrutınen ketken avtobus aydayıcısı Fevqulade vaziyetler nazirliginen bağlanıp, yardım soradı. O bildirdi ki, onıñ «Bogdan» avtobusı «Otar Moynaq köyü – Terekli Qoñrat köyü» («Uyutnoye-Moloçnoye») yolunda qar obasına oğradı.
Müessisede qayd ettiler ki, şiddetli yel eskeni ve çoq qar yağğanı sebebinden yolda tarlalardan tahminen 10-15 sm qar obaları peyda oldı, neticede yolda eki avtobus ve üç yengil maşna blok etilip qaldı.
Naqliye vastaları ağır tehnika vastasınen qar obalarından çıqarıldı. Avtobuslarda yolcular yoq edi, naqliye aydayıcıları da zararlanmadı ve tibbiy yardımğa muhtac olmadı.
Qırımda yanvar 10 ve 11 künleri furtuna havfı ilân etilgen edi. Qar yağması, yollarda buzlavuq, tuman olması beklenile. Saniyede 18-23 metr suratınen yel esecek.
