Belli qırımtatar yırcısı talebeleriniñ istidatlarını taqdim etti

12.01.201711:3338
Участники концерта

Mektep, soñra universitet seneleri aqlıma kele. Oquğanda, er vaqıt doğru ilimlerni, yani riyaziyat (matematika), fizikanı begene edim… Bular mantıq tefekkürini inkişaf ettirmege imkân bere. Ağır vazifeni çezseñ, quvançıñ sıñırsız ola! Amma endi mektepni bitirgende ve aliy oquv yurtunda oquğanda klassik bediiy edebiyat oquvı, muzıka, tasviriy sanatqa büyük meraq doğura.

Yazıq ki, vatanda zenaat boyunca çalışmağa qısmetım olmadı, vatandaşlarımıznıñ çoqusında olğanı kibi. İşni saylamağa imkân yoq edi. Boş vaqıt ise, muzıka, tasviriy sanat, teatrge bağışlanğan edi. Bu aqta maqaleler yazmağa bile başladım. Maqalelerni yazğanda, meselâ, kontsert nasıl azırlanğanı ve keçirilgenine merağım doğdı. Biz onı seyirciler zalından seyir etemiz, icracılardan taaciplenemiz. Buña ise nasıl irişmek mümkün, repetitsiyalar nasıl keçe, kontsert vaqtında perde artında neler ola? Qayd etmek kerek ki, menin merağım qanaatlendirildi. Maña kontsertke azırlıqnıñ şaatı olmaq ve eki yırnı icra etmek bile imkân berildi.

Qırım müendislik ve pedagogika universitetinde «Populâr KİNO muzıkası zemaneviy tarzda» mevzulı kontsert azırlanıla edi. Bu kontsert, farqlı milletlerniñ temsilcileri olğan talebelerni MUZIKA birleştirgenini köstergen edi! Talebelerniñ azırlanuvına Qırım Muhtar Cumhuriyetinde nam qazanğan artist Gulsum Tamak reberlik ete edi.

Repetitsiyada körüne edi ki, icracılar kelecek vaqianıñ mesüliyetini daa duymay ve kerekli qadar azır degil edi. Olarnıñ reberi, olar «uyansın» dep, ruh kötergen bir qaç nasiat bermek mecbur oldı. Sanalaştırmanı bir qaç kere başından başlamaq kerek olğan edi.

Ekinci repetitsiya daa yüksek seviyede keçti. Er biri ne ve nasıl yapacağını bile edi. Reber icracılarnı tenbiley edi. Hususan, icracınıñ seyircilerge teşekkür bildirmek içün egilmesi qaidelerini bildim. Perde, onıñ artında artist turğanını iç bildirmemek kerek. Perde artından turıp baqmaq iç te olmaz. Bular, yaramay tabiat sayılır.

С Шефикой Ахтемовой

Şefika Ahtemova ile

Soñki repetitsiya kontsert başlanuvına eki saat qalğanda keçirilgen edi. Bu vaqıtqa kelip, kerçek aytayım da, bazı artistlerni tanımadım bile. Er kes yañı anter ve kostümlerni kiyip, başqa oldı! Talebelerniñ yüzleri parılday edi. Kontsert vaqtında icracılarğa baqmağa meraqlı edi. Bazıları, sanağa çıqmazdan evel, oynap, öz nomerini repetitsiya yapqan edi. Talapkâr oca bile ayttı ki, er şey planlaştırılğanı kibi oldı. Fakultet yolbaşçılığı da talebelerge teşekkür bildirdi.

C Мамутом Усеиновым

Mamut Üseinov ile

Kontsertniñ baş teşkilâtçısı Gulsum Tamak qayd etti ki, birinci yapılğan iş yahşı oldı. Onıñ sözlerine köre, bu kün yağğan qar pek simvolik oldı.

«Er kes pek tırıştı, bütün nasiatlarnı yerine ketirdi! Eñ müimi şu ki, müsbet duyğular, sana tecribesi ve minnetdar seyirciler oldı… Birinci yapılğan iş yahşı oldı!))) Ögümizde, sanağa çıqış yolunda çoq meraqlı şey olacaq! Er şeyge rağmen, TEK MUZIKA DÜNYANI QORUYCAQ!» – dep yazdı Gulsum Tamak Facebook saifesinde.

Başta eñ yahşı icralarnı qayd etmek istey edim. Seyirciler olarnı kördi. Amma soñra hatırada tek ilk qış künü keçirilgen güzel kontsert aqqında hatıralarnı qaldırmağa istedim.

Böyle merasimler çoq olsun!

Редакция AVDET

Author: Редакция AVDET

Avdet gazetası