«Hizb ut-Tahrir» işi boyunca yaqalanğan musulmanlar daa bir madde boyunca qabaatlana bile

13.01.201712:30

«Hizb ut-Tahrir» işi boyunca yaqalanğan musulmanlar Rusiyede quvet yolu ile ükümni elge keçirüvnen qabaatlana bile.

Bu aqta Qırım adliyecisi Emil Kurbedinov Facebook saifesinde bildirdi.

«Rusiyede quvet yolunen ükümni elge keçirüv (Rusiye Federatsiyası Cinaiy kodeksiniñ 278-ci maddesi) – yarından başlap hususan bu madde boyunca «Hizb ut-Tahrir» işi boyunca yaqalanğan qırımtatar musulmanları qabaatlanacaq. Cinaiy kodeksniñ 205.5-ci maddesine daa 278-ci maddesi qoşulacaq, bu madde boyunca qabaatlanğanlar 12-den 20 yılğa qadar apiske qapatıla bile», – dep yazdı Kurbedinov.

Adliyeciniñ sözlerine binaen, böyle neticeni, Qırım mahkeme organlarınıñ qararlarını talil etip, çıqardı.

Avdetniñ evel bildirgenine köre, Rusiye Federatsiyası Yuqarı mahkemesi prokurornıñ şikâyetini qanaatlendirdi ve «Hizb ut-Tahrir» bölügini teşkil etkeninen qabaatlanğan Ruslan Zeytullayevniñ işini Rostov-na-Donu şeerindeki Şimaliy-Qavqaz arbiy okrug mahkemesine yolladı.

Фото аватара

Автор: Редакция Avdet

Редакция AVDET