«Çiygoznıñ işi» boyunca mahkemede «zararlanğannıñ» delilleri onıñ zalda bulunmağanı vaqıtta diñlenildi

16.01.201723:40

Qırım Yuqarı mahkemesi qırımtatar faali Ahtem Çiygoznıñ işi boyunca nevbetteki toplaşuvda zararlanğan kişiniñ delillerini onıñ mahkeme zalında bulunmağanı vaqıtta seslendirdi.

Bu aqta yanvar 16-da Çiygoznıñ adliyecisi Nikolay Polozov Twitterde yazdı.

«Zararlanğan Şlâginniñ bulunğan yerini belgilemek imkânı olmağanı sebebinden mahkeme onıñ delillerini seslendirmek qararını aldı», – dep yazdı Polozov.

Adliyeciniñ bildirgenine köre, «şaat Arpatlını da mahkeme tapıp olamadı. Amma onıñ delilleri şimdilik seslendirilmeycek, çünki onı imaye tarafı taptı».

Bundan da ğayrı, toplaşuvnıñ birinci qısmı devamında mahkeme prokuror tarafından taqdim etilgen delillerni, hususan 2014 senesi fevral 26-da keçirilgen mitingde çıqarılğan fotoresimlerni, baqıp çıqmağa teklif etti.

«Saat 14:24-ke qadar çıqarılğan fotoresimler baqıldı. Bu vaqıtqa qadar fotoresimlerde iç kütleviy nizamsızlıq kösterilmey. Bunen beraber, Ahtem Çiygoznıñ resimleri de yoq edi, bu ise, zararlanğan şaatlarnıñ delillerine zıt kele. Olarnıñ qayd etkenlerine köre, Çiygoz nasıldır usullarnen miting iştirakçilerine emirler bergen edi, olar teşkil etken koridorda areket etken edi», – dep bildirdi adliyeci video izaatında.

Evel bildirilgen malümatqa köre, yanvar 16-dan Aqmescitte Ahtem Çiygoznıñ işi boyunca mahkeme toplaşuvları devam etti.

Фото аватара

Автор: Редакция Avdet

Редакция AVDET