Eda etken vazifesini yanvar 20-de yekünleycek Amerika Qoşma Ştatları prezidenti Barak Obama ilân etti ki, Rusiye Federatsiyası siyaseti Qoşma Ştatlar tışqı siyaseti ve milliy havfsızlığı içün alâ daa telükeli ola.
Böyle munasebet ile amerikalı prezident Rusiyege qarşı Ukrainadaki vaqialar sebebinden sanktsiyalarnı devam ettirdi.
Bu aqta yanvar 13-te Beyaz Saray saytında derc etilgen vesiqalarda söz yürsetile.
«Rusiye Federatsiyası ükümetiniñ areketleri ve siyaseti, AQŞ milliy havfsızlığı ve tışqı siyaseti içün alâ daa adetten tış ve fevqulade telüke ola. Bunıñ içün men qarar berdim ki, 13660 fermanına binaen, Ukrainağa nisbeten fevqulade (sanktsion) nizamını devam ettirmek kerek», – dep qayd etti prezident.
Aynı nizamnı Obama İran, Kuba, Libiya, Zimbabve, Venesuelağa ve «Yaqın Şarqta barışıqnı bozabilecek terroristlerge» qarşı da devam ettirdi.
Umumen olaraq, Ukrainadaki vaqialar sebebinden Rusiyege qarşı üç AQŞ prezidentiniñ fermanı çıqarıldı – 2014 senesi mart 16 ve 20-de, aynı sene dekabr 19-da Qırım boyunca, dep bildire TASS agentligi.
