Tataristanda tatar tili yekâne resmiy til olaraq qullanılması teklif etildi

17.01.201717:15

Yanvar 17-de Bütün tatar cemaat merkeziniñ (BTCM) Prezidiumı Tataristandan Devlet duması, Devlet şurası ve Qazan Şeer duması deputatlarına muracaatnı yolladı, vesiqada tatar tili saqlavı içün onıñ Tataristanda yekâne devlet tili olaraq qullanılması teklif etile.

«1990 senesinden başlap, Tataristan parlamenti ve ükümeti tatar tili saqlavı ve inkişafı içün küreşni alıp barğanını köstermege muvafaqiyetli tırışa. Bu vaqıt ise, Rusiyede dört biñ, cumhuriyette 699 tatar mektebi qapatıldı, Tatar devlet gumanitar ve pedagogika universiteti, Qazan federal universitetinde tatar fakultetleri qapatıldı. Tataristan Cumhuriyeti Devlet şurasında 26 yıl devamında tatar tilinde bir toplaşuv bile teşkil etip olamadılar. Qazan Şeer dumasında ise, sinhron tercimeler lâğu etildi, yani resmiy olaraq Tataristan paytahtında bir devlet tili bar – rus tili. Daa bir unikal şey – Tataristan paytahtı parlamentinde tatar tilinde sözde bulunma yasaq etildi!» – dep aytıla muracaatta.

BTCM faalleri kütleviy haber vastalarında ve içtimaiy ağlarda «Tatar tilini nasıl saqlamaq mümkün?» mevzulı muzakerelerni kütleviy şekilde keçirmege teklif etti.

«Tataristanda bir devlet tili olmalı – tatar tili. Radikalmi? Belki, tatar tilini saqlamaq içün başqa teklifler bar? Tataristanda kerçek eki resmiy tilniñ olması mümkünmi? Keliñiz, muzakere eteyik!» – dep teklif etti teşkilât azaları, bildire «Ideal.Realii».

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET