Qırımda yanvar 17-de 7 qaza yüz berdi, neticede bir kişi elâk oldı ve daa eki adam yaralandı.
Bu aqta Yol areketi havfsızlığı devlet inspektsiyasınıñ matbuat hızmeti bildire.
Sudaqta saat 6:55-te Hyundai avtomobiliniñ aydayıcısı yolnıñ sağ tarafında ketken piyadeni urdı. Aqay kişi miy sarsuvı ve diger yaralarnı aldı.
Aqmescitte (Simferopol) saat 7:15-te Daewoo Nexia avtomobiliniñ aydayıcısı cayav keçitinden yolnı keçken aqay kişini urdı. Piyade qapalı qafa-miy ve qafes yaralarını aldı.
Qurman (Krasnogvardeyskoye) rayonında saat 8:30-da Mercedes-Benz avtomobiliniñ aydayıcısı havflı suratınen areket etip, maşnanı aydap olamadı ve yol kenarına çıqıp, terekke uruldı. Yolcunıñ ayağı qırıldı.
Kezlevde (Yevpatoriya) saat 12:20-de Hyundai Accent avtomobiliniñ aydayıcısı yol çatışmasında baş yolda ketken Toyota Corolla maşnasına yol bermedi. Qaza neticesinde birinci avtomobilniñ aydayıcısı yaralandı.
Bağçasaray rayonında saat 13:40-ta VAZ-2106 avtomobiliniñ aydayıcısı burulışta havfsız suratqa keçmeyip, maşnanı idare etip olamadı, maşna yol kenarına çıqtı ve avdarıldı. Aydayıcı yaralandı, yolcu miy sarsuvı ve diger yaralarnı aldı.
Canköyde saat 16:45-te tirkemeli yük maşnası aydayıcısı areket etmege başlağanda, onıñ areketi havfsız olacağından emin olmayıp, piyadeni urıp öldürdi.
Aqmescitte saat 21:30-da Jeely aydayıcısı, havfsız mesafeni tutmayıp, onıñ ögünde toqtağan Cee’d avtomobilinen çatıştı. Neticede birinci maşna qarşı taraf yolğa çıqtı, o yerde VAZ-21099 avtomobilinen çatıştı. Jeely aydayıcısı miy sarsuvı ve diger yaralarnı aldı.