Aqmescitte Reşat Ametovnıñ hatırasına bağışlanğan dua merasimi keçirildi

24.01.201718:10

Bugün, yanvar 24-te Aqmescitte (Simferopol) 2014 senesi öldürilgen qırımtatar faali Reşat Ametovnıñ hatırasına bağışlanğan dua merasimi keçirildi.

Bu aqta Qırımtatar Qurultayı Merkeziy saylav komissiyasınıñ reisi Zair Smedlâyev bildirdi.

Dua, Reşat Ametovnıñ doğğan kününde keçirildi. Bugün o, 41 yaşını toldurır edi. Aqmescit qavehaneleriniñ birinde keçirilgen merasimde qırımtatar faalleri ve milliy areket veteranları iştirak etti.

Belli olğanı kibi, Reşat Ametov 2014 senesi mart 3-te Qırım Nazirler Şurası binası yanında bir kişilik sessiz piketke çıqtı. Aynı bu kün onı qaçırdılar, mart 15-te ise Ametovnıñ cesedi, üstünde zorbalıq izleri olıp, Qarasuvbazar rayonındaki ormanda tapıldı. Reşat Ametovnıñ apayı ve üç kiçik balası qaldı. Qırım ükümeti, qırımtatar faali öldürilmesiniñ açıqlanması içün mukâfat berecek, dep söz berdi. Amma cinayetçiler alâ daa tapılmadı.

Qırım uquq qoruyıcı gruppası bundan evel bildirdi ki, 2014 senesi noyabr 4-te Reşat Ametovnıñ öldürilüvi boyunca № 2014417004 cinaiy iş qapatıldı. Resmiy sebep: «Qabaatlı olaraq celp etilecek şahıs belgilenmedi». Amma 2016 senesi fevral ayında öldürilgen faalniñ apayı Zarina Ametova haber etti ki, öldürüv boyunca taqiqat yañıdan devam ettirildi.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

решат аметов

решат аметов2

решат аметов3

решат аметов4

решат аметов5

Фото аватара

Автор: Редакция Avdet

Редакция AVDET