Mahkeme qırımtatar kişige para cöremesini 50 faiz endirim ile tölemege teklif etti

24.01.201716:00

Bağçasaraydaki dünya mahkemesi Osman Belâlovğa 10 biñ ruble para cöremesini belgiledi, o, qanunsız kütleviy aktsiyada iştirak etkeninen qabaatlandı.

Qabaatlavnıñ fikrince, 2016 senesi mayıs 12-de Bağçasaray sakinleri bu kün qırımtatarlarda tintüvler keçirilgeninen bağlı uyğunlaştırılmağan aktsiyağa «Salaçıq» qavehanesi yanında toplaştı.

Osman Belâlov qabaatını tanımadı ve qayd etti ki, sakinler, vaqianı muzakere etmek içün toplaştı, olarnıñ iç şiarları ve timsalleri yoq edi, ve, videoğa köre, olar naqliyeniñ areketine keder etmedi.

«Toplaşuvnıñ başında biz bir qaç şefaat arizasını taqdim ettik, olarnıñ episi red etildi. Er şeyni evelden tahmin etmek mümkün edi. Dava malümatlarını ögrenmeyip, şaatlarnıñ delillerini bildirmeyip ve ögrenmeyip, şaatlarnı çağıruv aqqında şefaat arizasını bermege imkân bermeyip, muşavere odasına ketti. Bizni diñledi, başını salladı, ve 10 biñ ruble para cöremesini belgiledi. Bizim yuqarı müessisege şikâyet yazmaq içün 10 künümiz bar. Şikâyet arizasını mıtlaqa berecekmiz», – dep bildire Qırım.Aqiqat Belâlovnıñ imayecisi Lilâ Gemeciniñ sözlerini.

Qırımtatar Qurultayı Merkeziy saylav komissiyasınıñ reisi Zair Smedlâyev haber etti ki, mahkemede aktsiya işke tüşürilgen ki, oña binaen, para cöremesi 20 kün içinde tölenilse, o vaqıt cezanıñ yarısını tölemek mümkün, yani 5 000 ruble.

Qayd etmek kerek ki, işbu aktsiya 2016 senesi yanvar 1-den işke tüşürilgen, amma bu tek yol areketi qaidelerini bozuvnen bağlıdır. Ammabu aktsiya diger memuriy cezalarnen bağlı olğanı aqqında haber etilmegene di.

Dekabr 6-da Bağçasaray rayon mahkemesi Enver Şerfiyevni 15 biñ ruble para cöremesinen cezaladı, o, yerli «Salaçıq» qavehanesinde keçirilgen tintüvnen bağlı iş boyunca qabaatlandı. Aqay kişi qanunsız miting teşkil etüvde iştirak etkeni içün qabaatlı tanıldı. Mahküm etilgenniñ şefaat muracaatınen mahkeme diñlevi qırımtatar tilinde keçirildi.

Bundan evel Bağçasarary sakinleri Marlen Asanov, Emin Belâlov, Emil Belâlov, bunen beraber, Seyran Saliyev «Hizb ut-Tahrir» işi boyunca yaqalanğan musulmanlarnıñ evleri yanında qanunsız miting teşkil etüv ve bu mitingde iştirak etüv içün para cöremesinen cezalandı. Cöreme 10 biñden 20 biñ rublege qadar oldı.

Avdetniñ evel bildirgenine köre, mayıs 12-de Bağçasarayda rusiyeli uquq qoruyıcılar musulmanlarnıñ evlerinde, bunen beraber, yerli «Salaçıq» qavehanesinde bir sıra tintüvler keçirdi. Neticede Zevri Abseitov, Remzi Memetov, Rustem Abiltarov ve Enver Mamutov yaqalandı. Olar, Federal Havfsızlıq hızmeti (FSB) hadimleri tarafından Rusiyede terroristik tanılğan «Hizb ut-Tahrir» teşkilâtınen bağlı olğanında şeklenilip yaqalandı.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET