Nikolay Polozov PACE sessiyasında tamğalı boyunbağ taqıp iştirak etti

25.01.20179:30

Qırımtatar faalleri Ahtem Çiygoz ve İlmi Umerovnıñ adliyecisi Nikolay Polozov Avropa Şurası Parlament assambleyasınıñ (PACE) yanvar sessiyasında iştirak etti.

Sessiyada Polozov qırımtatar timsali olğan tamğa ile boyunbağnı taqıp iştirak etken edi. Bu boyunbağnı oña doğğan kününe qırımtatar faalleri bağışladı.

Adliyeci, sözde bulunıp, onıñ Qırımda taqip etilgenini bildirdi.

«Hususan, FSB meni İlmi Umerovnıñ menfaatlarını taqdim etkende maña belli olğan malümatlar boyunca sorğuğa çekecek ola. Bu ise, em rusiyeli qanunlarğa, em de halqara añlaşmalarğa zıt kele, amma bu mesele boyunca bütün şikâyetler körmemezlikke urula», – dep bildirdi Polozov.

Bunen beraber o qayd etti ki, siyasiy mabuslarnen bağlı vaziyetni tek Rusiye Federatsiyasına halqara basım vastasınen deñiştirmek mümkün olur.

Uquqçınıñ sözlerine binaen, PACE-niñ bu sessiyasında o, yekâne Rusiye vatandaşı oldı, çünki RF PACE-ge eyyetini yollamadı.

Avdetniñ bildirgenine köre, dekabr 6-da qırımtatar faalleri Qırım Yuqarı mahkemesi binası yanında adliyeci Nikolay Polozovnı doğğan künü ile hayırladı. Ediyeler arasında tamğalı boyunbağ da oldı. «Mustafa ağada körgen ve pahıllay edim!» – dep ayttı Nikolay Polozov ediyeni körgende.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

полозов

полозов2

Фото аватара

Автор: Редакция Avdet

Редакция AVDET