Bağçasaray sakinleri Seyran Saliyevniñ evinde tintüv keçirilgenine ve onıñ yaqalanğanına qarşı özüni qattı alıp bardı (VİDEO)

26.01.201714:50

Bağçasarayda Seyran Saliyevniñ evinde tintüv keçirilgen vaqıtta onıñ evi yanında onlarnen qırımtatarlar toplaştı.

Toplaşqanlar yüz bergen vaqialarğa qarşı özüni pek duyğulı alıp bardı. Olar, uquq qoruyıcılarğa aytqan sözlerinde Saliyevler qorantasına nisbeten yapılğan areketler adaletsiz olğanını qayd etken edi, Allahnıñ adını ve «Allahu Akbar!» («Allah Büyüktir!») degen sözlerini qıçırğan edi.

Avdetniñ bildirgenine köre, bugün, yanvar 26-da uquq qoruyıcılar qırımtatar milliy areketi faali Zodiye Saliyevanıñ oğlu Seyran Saliyevniñ evinde tintüv keçirdi. Bundan evel Seyran Saliyev «Hizb ut-Tahrir» işi boyunca şeklenilgen musulmanlarnıñ evlerinde tintüvler keçirilgende «Salaçıq» qavehanesi yanında qanunsız mitingde iştirak etkeni içün para cöremesinen cezalandı.

Seyran Saliyevniñ soy-sopları tafsilâtlı malümatnı bildirdi.

«Bizge qarar kösterilmedi, o (FSB hadimi, – Avdet) soñunda ayttı ki, olar onı alıp ketecekler, ve er şey yahşı olur», dep añlattı onıñ soy-sopları Facebook qullanıcısı Server Mustafayev paylaşqan videoda.

Yaqınlarnıñ sözlerine köre, uquq qoruyıcılar Saliyevge onıñ Vkontakte içtimaiy ağındaki saifesi boyunca sualler berecek ve bu İslâm Devletinen bağlımı dep soraycaq ola, dep bildire Qırım.Aqiqat.

«Bütün dolapnı qarıştırıp çıqtılar, «Krepost musulmanina» («Musulman qalesi») kitabını qıdıra ediler. Uquq qoruyıcılardan biri ayttı ki, İslâm Devleti ile bağlı bir şey tapmasalar, «Hizb ut-Tahrir» ile bağnı qıdıracaqlar», – dep ayttı soy-soplar.

Seyran Saliyev belli qırımtatar faali Zodiye Saliyevanıñ oğlu ola.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET