Emil Kurbedinov «Hizb ut-Tahrir» mitinginden videonı paylaşqanı içün mahküm etilecek

26.01.201717:24

Adliyeci Emil Kurbedinov Rusiye Federatsiyası Memuriy qanun bozuvları aqqında kodeksiniñ 20.3-ci maddesinde («Milliyetçi timsallerini, ya da ekstremistik teşkilâtlarnıñ timsallerini, ya da teşviqatı ya halq ögünde kösterüvi federal qanunlarnen yasaq etilgen timsallerni teşviq etüv ya da halq ögünde kösterüv») qayd etilgen qanun bozuvınen qabaatlana.

Bu aqta mühbir Anton Naumlük Facebook saifesinde bildirdi.

Onıñ sözlerine köre, dava açılmasınıñ sebebi, Aqmescitte (Simferopol) 2013 senesi Rusiyede yasaq etilgen «Hizb ut-Tahrir» teşkilâtı tarafından teşkil etilgen mitingden videonıñ Facebook saifesinde yerleştirilmesi oldı.

Kurbedinov mahkemede qabaatını qısmen tanıdı ve qayd etti ki, işbu videonı paylaşqan vaqıtta «Hizb ut-Tahrir» teşkilâtı Qırımda qanunğa uyğun olıp faaliyetini alıp barğan edi.

«O vaqıt, uzaq 2013 senesi, Aqmescitte «Hizb ut-Tahrir» teşkilâtınıñ çoq mitingi keçirilgen edi, ve men video ve foto malümatlarını paylaşabildim. Amma iç teşviqat aqqında söz yürsetilmey. O vaqıt «Hizb ut-Tahrir» Qırımda yasaq degil edi, qanunğa uyğun olıp faaliyetini alıp barğan edi. Men videonı paylaştım ve bu aqqında unuttım. Ekstremizmge qarşılıq merkeziniñ hadimleri maña bu yazı qanunnı bozğanını bildirse edi, men onı birden siler edim. Nasıldır niyetim yoq edi. Men bu yazı aqqında unuttım», – dep bildire Anton Naumlük Kurbedinovnıñ sözlerini.

Adliyeci muracaat etti ki, ceza para cöremesine qadar olsun. Mahkemeci muşavere odasına ketti.

Emil Kurbedinovnıñ işini Aqmescitteki Jeleznodorojnıy rayon mahkemesi baqa, işbu mahkeme adliyeciniñ cezasını belgileycek. Mahkemede onıñ imayecisi adliyeci Konstantin Rustemov ola. Kütleviy haber vastaları mahkeme toplaşuvına yiberilmedi.

Avdetniñ bildirgenine köre, yanvar 26-da Emil Kurbedinovnıñ ofisi ve evinde tintüv keçirildi. Onı ise, Ekstremizmge qarşılıq merkezine sorğuğa alıp kettiler.

Belli ki, Emil Kurbedinov Qırımda «Hizb ut-Tahrir» işi boyunca yaqalanğanlarnıñ resmiy imayecisi ola.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET