Seyran Saliyev çeçen icracısınıñ yırlarını paylaşqanı içün mahküm etile

26.01.201718:54

Bugün evinde tintüv keçirilgen Bağçasaray sakini Seyran Saliyev Rusiye Federatsiyasınıñ Memuriy qanun bozuvları aqqında kodeksi boyunca mahküm etile.

O, Rusiye Federatsiyasınıñ Memuriy qanun bozuvları aqqında kodeksiniñ 20.3-ci («Milliyetçi timsallerini, ya da ekstremistik teşkilâtlarnıñ timsallerini, ya da teşviqatı ya halq ögünde kösterüvi federal qanunlarnen yasaq etilgen timsallerni teşviq etüv ya da halq ögünde kösterüv») ve 20.29-ci («Ekstremistik malümatlarnı yapuv ve tarqatuv») maddeleri boyunca qabaatlana.

Mühbir Anton Naumlükniñ malümatına binaen, bir qabaatlav boyunca Saliyev 12 künge apiske qapatıla. Ekinci qabaatlav da baqıla – Timur Mutsurayevniñ (çeçen müellif-icracısı, Çeçenistanda silâlı davanıñ iştirakçisi. Onıñ yırlarınıñ mevzuları esasen çeçen davası ve islâm dini ile bağlı) yırlarını tarqatuv.

Avdetniñ bildirgenine köre, bugün, yanvar 26-da uquq qoruyıcılar qırımtatar milliy areketi faali Zodiye Saliyevanıñ oğlu Seyran Saliyevniñ evinde tintüv keçirdi. Bundan evel Seyran Saliyev «Hizb ut-Tahrir» işi boyunca şeklenilgen musulmanlarnıñ evlerinde tintüvler keçirilgende «Salaçıq» qavehanesi yanında qanunsız mitingde iştirak etkeni içün para cöremesinen cezalandı.

Adliyeci Emil Kurbedinov Rusiye Federatsiyası Memuriy qanun bozuvları aqqında kodeksiniñ 20.3-ci maddesinde («Milliyetçi timsallerini, ya da ekstremistik teşkilâtlarnıñ timsallerini, ya da teşviqatı ya halq ögünde kösterüvi federal qanunlarnen yasaq etilgen timsallerni teşviq etüv ya da halq ögünde kösterüv») qayd etilgen qanun bozuvınen qabaatlana. Onı üç yıl evel Facebook saifesinde videonı paylaşqanı içün mahküm etecekler.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET