Herson şeer meclisiniñ (Rusiyede 26.04.2016 mahkeme qararınen yasaq etilgen) reisi, «Küreş» qırımtatar radiosınıñ baş muarriri İbragim Suleymanov ve Herson vilâyetinde Meclis temsilcisi, qırımtatar temsilci organınıñ azası Abmecit Suleymanovğa qarşı suiqast azırlanılğan edi.
Bu aqta Herson şeer yolbaşçısı Vladimir Mıkolayenkoğa qarşı Yañı yıl arfesinde yapılğan suiqast boyunca dava taqiqatınen bağlı işler alıp barılğanda belli oldı. Bu iş boyunca yaqalanğanlar haber etti ki, sanki olar rusiyeli mahsus hızmetler tarafından Herson vilâyetinde vaziyetni kerginleştirmek içün celp etildi. Olar ayttı ki, olarnıñ cedvelinde nevbetteki qurbanlar Suleymanovlar olmaq kerek edi.
Olarnıñ sözlerine köre, suiqastnı planlaştırğan şahıslar qırımtatar faalleriniñ evlerini yaqacaq ve bunı keleckete içtimaiy ağlarda paylaşmaq içün videoğa çıqaracaq edi. Bunıñ maqsadı, ealini qorquzmaq ve regionda vaziyetni kerginleştirmek edi.
Bundan evel belli olmağan şahıslar şeer yolbaşçısınıñ evini yaqtı. Uquq qoruyıcılar vaqia yüz bergen yerde patlatıcı qarışma ile şişeni taptı. Neticede şeklenilgen insanlar yaqalandı, dep bildire «Küreş» radiosı.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
