Zubkov Türkiye vatandaşlığını almaq içün vesiqalar berdi

27.01.20179:1051
олег зубков

Qırımdaki «Taygan» arslan bağçası ve Yaltadaki «Skazka» ayvanat bağçasınıñ saibi Oleg Zubkov Türkiye vatandaşlığını almaq içün vesiqalar berdi.

Bu aqta o yanvar 26-da Aqmescitte (Simferopol) keçirilgen matbuat konferentsiyasında bildirdi.

«Men Türkiye vatandaşlığını almaq içün vesiqalar berem ve bunı saqlamayım, çünki men Türkiyeden Avropağa barmaq ve ayvanlarnı satın almaq kerekim, – dedi. o. – Amma menim «Taygan» ve «Skazka» bağçalarım, iqtisadiy vaziyet imkân bergeni qadar, Qırımda çalışacaq».

Bunen beraber, o haber etti ki, Türkiye tarafı ile İstanbul civarında yañı ayvanat bağçasını açmaq meselesini muzakere etken edi ve Rusiyede yaşağan vatandaş olaraq vesiqalarnı bergen edi. Türkiye vatandaşlığını almaq içün vesiqalarnı da, Zubkovnıñ sözlerine köre, o, Rusiye vatandaşı olaraq bergen edi, dep bildire «Krıminform».

Avdetniñ haber etkenine köre, «Taygan» arslan bağçasınıñ saibi Oleg Zubkov İstanbul civarında dünyada eñ yahşı ayvanat bağçalarından birini açmağa planlaştıra. Onıñ sözlerine binaen, leyha ve qurucılıq Türkiye devlet büceti parası vastasınen yapılacaq. Qurucılıq yekünlengen soñ, ayvanat bağçasınıñ bütün territoriyası «Taygan-Croup» şirketine uzun müddetke idare etüv içün teslim etilecek.

«Qırım baarine» qol tutqan Oleg Zubkov yerli ükümet ile bağlı davalı vaziyetlerge bir qaç sefer tüşken edi.

Yaqında belli oldı ki, «Taygan» arslan bağçası territoriyasındaki binalarnıñ birinde yanvar 15-te 29 yaşındaki aqay kişiniñ yaralanğan cesedi tapıldı.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Редакция AVDET

Author: Редакция AVDET

Avdet gazetası