Rusiyeli adliyeciler Emil Kurbedinovğa qol tutqanını bildirdi

30.01.201721:55

Rusiyeli adliyeciler olarnıñ zenaatdaşı, Qırım adliyecisi Emil Kurbedinovnıñ yaqalanuvından qasevet çekkenini bildirdi.

Olar, açıq mektüp ile muracaat etti ve yaqalanğan adliyecige qol tutqanını ilân etti.

Qırım adliyecisi Emil Kurbedinov Rusiyede yasaq etilgen «Hizb ut-Tahrir» teşkilatınıñ mitinginden 2013 senesi videonı paylaşqanı içün 10 künge apis etildi.

Rusiyeniñ çeşit regionlarından 33 adliyeci imza qoyğan mektüp «Mediazona» uquq qoruyıcılar resursında derc etildi.

Uquqçılarnıñ fikrince, 2014 senesinden başlap Rusiye Federatsiyası Memuriy qanun bozuvları aqqında kodeksiniñ 20.3-ci maddesi («Milliyetçi timsallerini, ya da ekstremistik teşkilâtlarnıñ timsallerini, ya da teşviqatı ya halq ögünde kösterüvi federal qanunlarnen yasaq etilgen timsallerni teşviq etüv ya da halq ögünde kösterüv») rusiyeli ükümet tarafından kütleviy şekilde siyasiy maqsatlarnen işletile. Aynı bu madde boyunca Emil Kurbedinov yaqalandı.

«İç şübe yoq ki, adliyeciniñ içtimaiy ağda video paylaşqanı sebebinden yaqalanuvınen aynı vaqıtta onıñ ofisi ve evinde keçirilgen tintüvler evelden planlaştırılğan ve siyasiy maqsatlarnen yapılğan, bunıñ maqsadı qorquzmaq, lekeleme malümatlarnı tapmaq ve onı zenaat boyunca faaliyetni yapmaqtan uzaqlaştırmaqtır», – dep aytıla uquq qoruyıcılarnıñ beyanatında.

Bundan da ğayrı, uquq qoruyıcılar ilân etti ki, olar, adliyecini taqip etkenini qanunğa uyğun olğanını sayğan Qırım Adliyeci palatasınıñ noqta-i nazarından şaşa.

«Biz – rusiyeli adliyeciler, bu cümleden Qırımda çalışqanlar, zenaatdaşımızğa qol tutqanımıznı bildiremiz, Rusiye Federatsiyası Federal Adliyeciler palatasına onı qorçalamaq ve siyasiy taqip etilmesine yol bermemek muracaatınen bulunamız», – dep aytıla mektüpte.

Avdetniñ bildirgenine köre, Amnesty International uquq qoruyıcı teşkilâtı adliyeci Emil Kurbedinovnı deral azat etmege çağırdı.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET