Fevral 1-de Aqmescitte (Simferopol) qırımtatarlar musulman qadınları içün Qara Biber urba brendini taqdim etti.
Taqdim merasimi Halqara hicap kününe bağışlanğan qızlar toplaşuvı çerçivesinde keçirildi. Brendniñ büyük taqdimi ise, yani ilk büyük kollektsiyanıñ taqdimi ve brend tükânınıñ açılışı baarge planlaştırılğan. Şimdilik Qara Biber urbasını internet vastasınen sımarlamaq mümkün. İnstagram ağında mahsus saife bar: @qara.biber
Urba dizaynerleri, brend müellifleri üç tuvğan tata-qardaş ola – Elvira, Aliye ve Romina Ablayevalar.
Romina Ablayevanıñ Avdetke bildirgenine köre, Qara Biber urbası em qapalı, em de yavluq baylamaq yolunda olğan qadın-qızlar içün kelişir.
«Biz güzel, oñaytlı ve yaraşıqlı urbanı tikemiz. Qızlar özüni raat, serbest ve güzel duysın, dep», – dep ayttı o.
Dizaynerler er kün kiyilgen urbalardan aşlap, tantanalı merasimlerge kiyilgen urbağa qadar çeşit anterler tikecek ola.
Merasim çerçivesinde qırımtatar qızlarına endi belli olğan Zuhruf brendiniñ ilvanları da taqdim etildi. Musafirler içün mehendi, yavluq baylama, yavluqlarda resim yapuv boyunca hayriye master-klassları keçirildi, cıyılğan para Bağçasaraylı qız Evelina Bahşışevanıñ tedaviylenmesine teslim etilecek.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
