Poklonskayağa Baş prokuraturağa şikâyet etilecek

03.02.201711:00

«Matilda» filminiñ rejissörı Aleksey Uçitel Baş prokuraturağa onıñ daa çıqmağan filmini tenqit etken Rusiye Devlet duması deputatı, Qırım sabıq prokurorı Natalya Poklonskaya ve cemaat teşkilâtları temsilcilerinen alâqalı eki şikayet arizasını berecek.

Rejissörnıñ sözlerine köre, arizalar eñ yaqın vaqıtta Baş prokuraturağa teslim etilecek, dep yaza TASS.

Bundan evel Qırım sabıq prokurorı Baş prokuraturağa Fond kino tarafından Aleksey Uçitelniñ «Matilda» filminiñ yapılmasına ayırılğan bücet parasınıñ qullanılması qanunğa uyğun olğanını bir daa teşkermek ricasınen muracaat etti. Film, II Nikolay ve Mariinskiy teatrınıñ balerinası Matilda Kşesinskaya arasındaki munasebetler aqqında añlata.

Poklonskayanıñ fikrince, film stsenariyini mütehassıs tarihçılar ve kilse (ortodoks) temsilcilerinden ibaret olğan ekspert komissiyası teşkermek kerek, çünki «filmde baş qaramanlar resmiy olaraq qanunlaştırılğan şahıslar ola».

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET