Rusiyege qarşı sanktsiyalar Qırım Ukrainağa qaytarılacağına qadar devam etmek kerek.
Bu aqta Birleşken Milletler Teşkilâtı (BMT) yanındaki Amerika Qoşma Ştatları daimiy temsilcisi Nikki Heyli, bu vazifesinde ilk sefer sözde bulunıp, halqara teşkilâtnıñ Havfsızlıq Şurası toplaşuvında bildirdi.
«Qırım – bu Ukraina parçasıdır, – dep qayd etti o. – Qırımnen bağlı kirsetilgenimiz sanktsiyalar Rusiye Federatsiyası Ukrainağa yarımada boyunca nezaretni qaytaracağına qadar devam etecek».
«Rusiyenen munasebetlerimizniñ eyileşmesini isteymiz», – dedi Heyli, ve Moskvanı «tecavuz», «işğal» ve «arbiy istilânen» qabaatladı.
Onıñ fikrince, Ukrainadaki vaziyet «Rusiye areketleriniñ takbih etilmesini talap ete».
AQŞ daimiy temsilcisi qayd etti ki, Vaşington ukrain halqına ve Minsk añlaşmalarına qol tuta, dep bildire TASS agentligi.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
