10 kün memuriy yaqalavdan soñ adliyeci, qırımtatar faalleri ve «Hizb ut-Tahrir» işi boyunca yaqalanğanlarnıñ imayecisi Emil Kurbedinov vaqtınca bulunma izolâtorından azat etildi.
Onıñ dostları ve yaqınları onı o yerde ve evde qarşıladı. Adliyeci yaşağan evniñ kirişi kürreçikler ve onıñ fotoresimlerinen yaraştırılğan.
Avdetniñ evel bildirgenine köre, yanvar 26-da Qırım adliyecisi Emil Kurbedinov Rusiyede yasaq etilgen «Hizb ut-Tahrir» teşkilâtı tarafından teşkil etilgen mitingden 2013 senesi videonı paylaşqanı içün mahküm etilip, 10 künge apis etildi. Bundan evel Kurbedinovnıñ dairesi ve ofisinde tintüv keçirildi.
Amnesty International halqara uquq qoruyıcı teşkilâtı Emil Kurbedinovğa qol tutqanını kösterdi ve onıñ azat etilmesini talap etti. Bundan da ğayrı, rusiyeli adliyeciler oña destek köstergenini bildirgen açıq mektüp ile muracaat etti.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
