Adliyeci Kurbedinov Qırımda işini devam etecek ola

06.02.201710:25

Yaqalavdan azat etilgen Qırım adliyecisi Emil Kurbedinov haber etti ki, yarımadada musulmanlarını imaye etüv boyunca işini devam etmege niyetlene.

«Men ve menim zenaatdaşlarım başqa bir çare körmeymiz – biz çalışacaqmız, aynı adamlarnıñ aqlarını qorçalamağa devam etecekmiz. Elbet, işime tesir ettiler. Mesele şunda ki, meni bir qaç dava ceryanından çıqardılar…» – dep añlattı Kurbedinov.

Adliyeci işine fevral 6-dan, bazarertesi kününden başlap buyuracaqtır.

Avdetniñ evel bildirgenine köre, yanvar 26-da Qırım adliyecisi Emil Kurbedinov Rusiyede yasaq etilgen «Hizb ut-Tahrir» teşkilâtı tarafından teşkil etilgen mitingden 2013 senesi videonı paylaşqanı içün mahküm etilip, 10 künge apis etildi. Bundan evel Kurbedinovnıñ dairesi ve ofisinde tintüv keçirildi.

Amnesty International halqara uquq qoruyıcı teşkilâtı Emil Kurbedinovğa qol tutqanını kösterdi ve onıñ azat etilmesini talap etti. Bundan da ğayrı, rusiyeli adliyeciler oña destek köstergenini bildirgen açıq mektüp ile muracaat etti.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET