«Asker» batalyonına Ukraina Silâlı quvetleri temsilcileri ücüm etti

13.02.201712:00

Elde etilgen malümatqa köre, fevral 12-den 13-ke keçer gecesi yüz bergen «Asker» batalyonına ücüm Ukraina Silâlı quvetleri (USQ) tarafından etildi.

Bu malümatnı Qırımtatar Milliy Meclisiniñ (Rusiyede mahkeme tarafından 29.09.2016 s. yasaq etilgen) reisi Refat Çubarov tasdıqladı.

«Vaqia arbiy adamlarnıñ maqsatsız ve küç qullanuvı ile «Asker» cemaat teşkilâtı tarafından teminlengen territoriyanı zapt etüvinen başlandı, bu yerde Noman Çelebicihan adına qırımtatar batalyonınıñ askerleri buluna», – dep yazdı o.

Çubarovnıñ sözlerine köre, «vaqia çerçivesinde Ukraina Silâlı quvetleriniñ arbiy adamları bazı inşalarnı ve «Asker» cemaat teşkilâtınıñ mülküni bozdı, «Asker» teşkilâtı azalarına nisbeten küç qullanma ıntıluvlar oldı».

Mühbir Osman Paşayev vaqia boyunca tafsilatlı malümat bildirdi. Onıñ sözlerine köre, ücüm, USQ-niñ 34-ci batalyonı 57-ci brigadası tarafından etildi. Vaqia neticesinde ATR telekanalınıñ tehnikası da elge keçirildi, amma soñra qaytarıldı.

«Ücüm saruş mayor yolbaşçılığında etildi, oña yerli iş adamı – Çonğarda qavehane ve bazar saibi – şikâyet etti. «Tatarlar topraq damartısını zapt etti ve o yerde qamaçavnı yerleştirdi» – dep ayttı iş adamı mayornen içki içip. Bunıñ içün, çoq tüşünmeyip, mayor adaletni ömürge keçirmek qararını aldı, soldatlarnı turğuzdı ve askerler ermeni iş adamını tatar zulumından azat etmege başladı. Saba mayor yerli meclis temsilcilerinden afu soray edi, olarnı da yerge yatqızıp qoydılar», – dep bildirdi Paşayev.

Belli olğanına köre, şimdiki vaqıtta vaqia yüz bergen yerde milliy politsiya ve Ukraina havfsızlıq hızmetiniñ hadimleri çalışa. Aynı o yerde Herson vilâyetinde Qırımtatar Milliy Meclisiniñ temsilcisi Abmecit Suleymanov ve «Qırım vatandaş qamaçavı» aktsiyasınıñ idarecisi Lenur İslâmov buluna.

Bunen beraber, Mudafaa nazirligi saytında bu vaqia boyunca resmiy izaat yoq.

Aynı vaqıtta «Pivden» operativ komandanlığınıñ yolbaşçı terkibi resmiy beyanat bildirdi.

«Ukraina silâlı quvetler tarafından «Asker» cemaat teşkilâtına etilgen ücüm nevbetteki feyk ve Ukraina silâlı quvetlerni yamanlamaq, ukrain cemiyetinde bazı kerginlikler ve işançsızlıq peyda etmek ıntıluvıdır. Ukraina imayecileri ücüm etmey, olar, ukrain halqını imaye etmek içün vazifelerini ömürge keçire!» – dep aytılğan beyanatta.

Bunen beraber, vesiqada qayd etile ki, arbiy adamlar fevral 12-de gece komandannıñ emiri ile arbiy noqtalarnı teminley edi. Noqtada işlerniñ yapılğan vaqıtta sanki pek silâlaştırılğan «qanunsız silâlı teşkilâtnıñ» temsilcileri kelgen.

«Bölükniñ hususiyetleri ve vaziyet şaraiti köz ögüne alınıp, teşkilât yaqalandı, silâsızlandırıldı», – dep ayta arbiy adamlar.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET