«Ölüm yolunda» altı qırımtatarnıñ ölüminde qabaatlı olğanlar azat etildi

16.02.20179:40

Aqmescit (Simferopol) aylançıq yolunda topraq omravı sebebinden yüz bergen facialı qazanen bağlı meselede noqta qoyuldı. O vaqıt qazada altı insan elâk oldı.

Qırım Taqiqat komiteti yolbaşçısı Mihail Nazarovnıñ bildirgenine köre, bu iş boyunca dört insan qabaatlı sayıldı: olarnıñ üçü amnistiya boyunca afu etildi, dörtüncisi ise vefat etti.

Nazarov qayd etti ki, amnistiya, bu insanlarnıñ qabaatlı olmağanını bildirmey. Onıñ aytqanında köre, umumen olaraq dava mürekkep edi, uquq qoruyıcı organlarınıñ hadimleri ise, taqiqat çerçivesinde unikal ekspertizalar keçire edi.

2014 senesi sentâbr 28-de Aqmescit-Bötke (Simferopol-Dubki) yolunda topraq omradı. Doquz metrlik çuqurğa içinde sekiz adam olğan avtomobil yıqıldı. Olar toydan qayta edi. Neticede altı adam, olarnıñ arasında eki bala, elâk oldı, daa eki bala ağır yaralandı. 2015 senesi noyabr ayında Rusiye Federatsiyası Qırım boyunca Taqiqat komiteti «Bağçasaray yol-qurucılıq idaresi» şirketiniñ müdiri, baş müendis ve ustağa qarşı qabaatlav çıqardı, ve işni mahkemege teslim etti.

Taqiqat malümatına binaen, 2009 senesi noyabr ayından 2010 senesi dekabr ayına qadar qabaatlanğan kişiler leyha qararlarınıñ ömürge keçirilmesini nezaret etmedi, neticede alançıq yolda topraq omradı. Qabaatlanğanlar çıqmama aqqında vesiqanı imzadı. Olar, Rusiye Federatsiyası Cinaiy kodeksiniñ 109-cı maddesi 3-ci qısmında («muqaytsızlıqtan eki ya da ziyade şahısnıñ ölümine ketirüv»), bunen beraber, RF CK 118-ci maddesi 2-ci qısmında («şahsınıñ zenaat boyunca öz vazifelerini kelişmegen şekilde becergeni neticesinde muqaytsızlıqtan sağlıqqa büyük zarar ketirüv») qayd etilgen cinayetler yapqanınen qabaatlandı.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET