Qırımda qırımtatarlar kene de sorğuğa çekile: Mustafa Cemilevniñ ağası FSB-ge çağırıldı

16.02.201718:45

Qırımda bir qaç qırımtatar kişi Rusiye Federal havfsızlıq hızmeti (FSB) idaresiniñ hadimleri tarafından sorğuğa çekildi. Sorğuğa milliy areket veteranı, Mustafa Cemilevniñ ağası Asan Cemilev de davet etildi.

Qırımtatar faali İlmi Umerovnıñ malümatına binaen, sorğuğa Bağçasaray sakinleri Musa Tatarov, Mustafa Mustafayev davet etildi.

Qırımtatar milliy areketi iştirakçisi Musa Tatarovnıñ bildirgenine köre, FSB hadimi Bağçasaraynıñ altıncı qasabası faalleriniñ 2015 senesi musulman bayramlarınıñ birini azırlağan teşkilâtçılarnen alâqalarından meraqlana edi. Taqdim etilgen videolarda, yerli faallerden ğayrı, «Hizb ut-Tahrir işi» boyunca yaqalanğanlar da körüne.

«Ğaliba, FSB hadimleri qabaatlav içün qoşma deliller qıdıra», – dep tahmin etti Umerov.

O qayd etti ki, FSB-ge sorğuğa daa qırımtatarlar çağırıldı, şimdiki vaqıtta bular kim olğanı belgilene.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET