Rusiye Federatsiyası ükümetiniñ Tramptan Qırım boyunca noqta-i nazarı sebebinden közü qayttı

16.02.201710:2562
рф_сша

Rusiye ve Amerika Birleşken Ştatları arasındaki munasebetlerniñ yañıdan tiklenilmesi lâğu etilmegen, amma Trampnıñ Qırım boyunca beyanatları köstere ki, yañı amerikalı prezidentten beklemeler aşırılğandır.

Böyle fikirni Devlet Duması halqara meseleler boyunca komitetiniñ başı Leonid Slutskiy bildirdi.

«Rusiye ve Amerika arasındaki munasebetlerniñ yañıdan tiklenilmesi lâğu etilmegen, amma bu kibi beyanat (Qırım aqqında – Avdet), salqın duş kibi, bizim Tramp ve onıñ taqımınen bağlı pek tez ve aynı vaqıtta aşırı beklemelerimizni suvuta», – dep ayttı Slutskiy mühbirlerge.

Hatırlatamız ki, Beyaz Saraynıñ matbuat kâtibi Şon Spayser ilân etti ki, Amerika Birleşken Ştatları prezidenti Donald Tramp Qırımnıñ Ukraina terkibine qaytarılmasını bekley.

Bundan evel BMT yanındaki ABŞ daimiy temsilcisi Nikki Heyli ilân etti ki, Rusiyege qarşı sanktsiyalar Qırım Ukrainağa qaytarılacağına qadar devam etmek kerek. Onıñ fikrince, Ukrainadaki vaziyet «Rusiye areketleriniñ takbih etilmesini talap ete».

Avdetniñ bildirgenine köre, Beyaz saray qayd etti ki, Birleşken Milletler Teşkilâtı (BMT) yanındaki Amerika Birleşken Ştatları daimiy temsilcisi Nikki Heyliniñ Rusiyege qarşı sanktsiyalar boyunca noqta-i nazarı ABŞ prezidenti memuriyetiniñ noqta-i nazarına doğru kele.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Редакция AVDET

Author: Редакция AVDET

Avdet gazetası