Qırımda «Çiygoznıñ işi» boyunca 82-ci toplaşuv keçirildi

17.02.20179:4955
26 февраля 2014

Qırımtatar faali Ahtem Çiygoznıñ işi boyunca 82-ci mahkeme toplaşuvında prokuror şaat Valiyevden alınğan video delillerini taqdim etmege devam etti.

Bu videolarda tahminen saat 13-14-te (2014 senesi fevral 26-da – Avdet) yüz bergen vaqialar kösterile. Adliyeci Nikolay Polozovnıñ sözlerine köre, maddiy delillerniñ bu qısmı da şaatlar ve zararlanğanlarnıñ aytqanlarını red ete.

«Kamera insan boyu seviyesinde bulunğanda, ögde turğan adamlar artında neler olğanını körmek imkân yoq. Bu şarait bir sıra şaat ve zararlanğanlarnıñ delillerini red ete, olar, adam sürüsi içinde, Çiygozdan onlarca metr uzaqlığında bulunıp, onıñ neler yapqanını körgenlerini ve eşitkenlerini aytqan edi», – dep ayttı Polozov.

Adliyeciniñ malümatına binaen, videolarnıñ bazılarında körüne ki, Qırım MC Yuqarı Şurası binasınıñ merkez kirişinde bir sıra adamlar, bu cümleden Refat Çubarov ve Sergey Aksönov, toplana, dep bildire «Qırım.Aqiqat».

«Eki videoda Ahtem Çiygoz bar. Qabaatlav oña isnat etken areketlerden iç birini o etmey. Çıqış vaqtında Çiygoz bina kirişinde bulunğan adamlar arasında yoq. Bir an Çubarovğa Zaur Smirnov yaqınlaştı ve miting iştirakçilerine nasıldır emirler bermege başladı. Yani o, taqiqat Ahtem Çiygozğa isnat etken areketlerni etmege başlay», – dep qoştı Polozov.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Редакция AVDET

Author: Редакция AVDET

Avdet gazetası