Keçken sene dekabr ayında içtimaiy ağdaki muzakerelerde qırımtatar deputatlarını deñizge batırmağa teklif etken «Yedinaya Rossiya» firqasınıñ azası ve Aqmescit rayonınıñ Saraylı Qıyat (Mirnoye) köyü mektebiniñ ocası Natalya Krıjko işbu vaqiağa izaatlarını berdi.
Bu aqta Aqmescit rayonı memuriyeti yolbaşçısınıñ muavini Ruslan Yaqubov bildirdi.
Yaqubovnıñ sözlerine köre, 2016 senesi dekabr ayında Aqmescit rayonı memuriyeti işbu vaqia boyunca teşkerüv keçirdi.
«Teşkerüv çerçivesinde bu yazışmada iştirak etken «2 sanlı Saraylı Qıyat mektebi» ocası yazılı şekilde añlattı ki, onıñ saifesini kimse bozdı, ve bu mesele boyunca bütün izaatlar ve muzakereler onıñ şahsiy sözleri degil», – dep añlattı Yaqubov.
Bunen beraber memur qayd etti ki, cemaatçılıq temsilcileri bu muzakereler boyunca ükümet organlarına muracaat etti. Bunıñ içün olar mektep ocaları kollektivi ve talebelerniñ ana-babaları ile iş körüşüvine davet etildi. Körüşüvni Ruslan Yaqubov Saraylı Qıyat mektebinde keçirdi. Merasim milletlerara munasebetler ve balalarğa ana tilinde tasil almaq imkân berilmesi meselelerine bağışlandı. Körüşüvde milletlerara ve dinlerara munasebetler meseleleri boyunca bölükniñ müdiri İslâm Üseinov, mektepten aldın ve umumiy tasil bölüginiñ baş mütehassısı Kira Skornâkova ve Aqmescit rayonı imamı Raim Gafarov iştirak ettiler.
Avdetniñ evel bildirgenine köre, muzakereler Facebook içtimaiy ağında «Yedinaya Rossiya» firqasınıñ azası Natalya Krıjko, «Partiya rosta» firqasından Devlet Duması deputatlarına sabıq namzeti Aleksandr Talipov ve «Tavriya birligi» cemaat teşkilâtı reisiniñ sabıq muavini Liliya Didenko Qırım cemaatçıları arasında oldı. Krıjko Aqmescit rayonındaki Aqtaçı Qıyat (Beloglinka) ve Saraylı Qıyat (Mirnoye) köyleriniñ kirişinde tarihiy adlar ile işaretlerni qoymağa teklif etken ve bu qararğa qol tutqan deputatlarnı Qara deñizge batırmağa teklif etti. İşbu vaqia içtimaiy ağlarda çoq muzakerelerniñ peyda olmasına yol berdi.
O vaqıt Sovet edebiyatı klassigi, özbek ve rusiyeli nesirci Timur Pulat mahkemede «Yedinaya Rossiya» firqasınıñ azası Natalya Krıjko ve Qırım cemaatçısı Aleksandr Talipovğa qarşı cemaat qabaatlayıcısı olaraq çıqmağa istegenini bildirdi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
