Bugünki künde Aqmescitteki Boçurça (Kamenka) qasabasında fevral 21-de yaqalanğan 11 qırımtatar kişiniñ taqdiri belli degil. Olar, soy-sopları ile bağğa çıqmay ve apiste bulunacaq yerge kelgende bir şey haber etmedi.
Bu aqta adliyeci Emil Kurbedinov bildirdi.
«Ameldeki qanun bozulıp, olarğa er kün telefon etmek imkânı berilmey!» – dep yazdı o.
Bunen beraber, Kurbedinov qayd etti ki, memuriy kodeks boyunca yaqalanğanlarnıñ soy-soplarınen körüşmek aqqı bar.
Avdetniñ bildirgenine köre, tintüv keçirilgen Marlen Mustafayevniñ evine kelgen 11 qırımtatar kişi (Ruslan Suleymanov, Osman Arifmimetov, Remzi Bekirov, Mecit Abdurahmanov, Ablâkim Abdurahmanov, Valid Abu Farid, Seyran Murtazayev, Alim Karimov, Reza İzetov, Enver Tasinov) kütleviy merasimlerni keçirüv aqqında qanunnı bozğanları içün memuriy ceza olaraq 5 künge yaqalandı. Fevral 21-de Marlen Mustafayevniñ Boğurçada (Kamenka) evinde OMON iştiragi ile tintüv keçirildi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
