Fevral 23-te Bağçasaraydaki Han Çayır qasabası camisinde 1918 senesi fevral 23-te vahşiycesine öldürilgen belli cemaat ve siyaset erbabı, müfti, «Ant etkenmen» qırımtatar milliy gimni sözleriniñ müellifi Noman Çelebicihannıñ hatırasına dua etildi.
Bu aqta Qırımtatar Qurultayı Merkeziy saylav komissiyasınıñ reisi Zair Smedlâyev Facebook saifesinde bildirdi.
Dua merasiminde qırımtatar milliy areketi veteranları ve faalleri, bunen beraber, yerli sakinler iştirak etti. Bu yerge kelgen adamlar 1944 senesi fevral 23-te tuvğan topraqlarından sürgün etilgen çeçen ve inguş halqlarınıñ genotsidi qurbanlarınıñ ruhlarına da dua etti.
1918 senesi fevral 23-te Qırım Halq Cumhuriyeti ükümetiniñ birinci reisi, I-ci Qırımtatar halqı Qurultayınıñ teşkilâtçısı, Qırım, Ukraina, Litvaniya, Poloniya ve Beyaz Rusiye birinci müftisi Noman Çelebicihan vahşiycesine bolşevikler tarafından öldürildi ve Qara deñizge atıldı.
Belli ki, çeçen ve inguş halqlarınıñ Çeçen-İnguş Muhtar Sovet Sotsialistik Cumhuriyeti ve Dağıstan MSSC topraqlarından Orta Asiya ve Qazahistanğa sürgün etilmesi 1944 senesi fevral 23-te başlanıp, mart 9-da yekünlendi.
Resmiy sovet malümatına binaen, Çeçen-İnguş MSSC-den 496 biñ insan – vaynah halqı temsilcileri, bu cümleden, Qazah SSC-ne – 411 biñ insan (85 biñ aile) ve Qırğız SSC-ne – 85,5 biñ insan (20 biñ aile) mecburen sürgün etildi. Diger malümatqa köre, sürgün etilgenlerniñ sayısı 650 biñden ziyade insan oldı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
