Aqmescitteki (Simferopol) merkezindeki Karl Marks ve Puşkin soqaqlarında tamir işleri alıp barılğan soñ bu işniñ tüzetilmesi de muvafaqiyetsiz oldı.
Bu aqta «Argumenti Nedeli – Krım» bildire.
Bazı yerlerde yañıdan qoyulğan qaldırım taşçıqları kene de bozuldı. Şeer sakinleriniñ fikrince, bunıñ sebebi, işler buzlağan topraqta yapılğanı oldı.
Bunen beraber, Aqmescit sakinleri taşçıqlarınıñ bazıları yamavlar kibi körüngeninden açuvlana, bazıları qayd ete ki, soqaqnıñ başında «tamir işleri timsali» tura – aşlama parçası, qaysı biri küzde yoq etilgen büyük yüke teregi yerine oturtıldı.
İçtimaiy ağlar qullanıcıları ayta ki, bundan evel Karl Marks ve Puşkin soqaqlarınıñ körünişi daa güzel edi, böyle tamirge ise diversiya dep aytalar.
Avdetniñ evel bildirgenine köre, Aqmescit merkezinde işçiler qaldırım taşçıqlarını ava arareti -10 dereceni teşkil etkende qoya edi. İşler, qarantlıq tüşken soñ da devam etken edi.
Bundan da ğayrı, Qırım blogeri Aleksandr Gorniy «Eho Moskvı» saytında «Diversantlar Aqmescit merkezine sürip kirdi» serlevalı fotoreportajnı paylaşıp, Aqmescit merkezindeki tamirni diversiya dep adlandırdı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
