Yırcı Yuliya Samoylova Rusiyeni «Eurovision-2017» yır yarışında temsil etecek.
Bu aqta yarışta rusiyeli eyyetniñ başı Yuriy Aksüta bildirdi.
«Muzıka karyerası duyğu ve beden tarafından çoq küç talap ete. Yulâ bu yolda muvafaqiyetlerge yetkeninden ayretlenem. Bellesem, mayıs 11-de bütün dünyada millionlarca seyirciler biznen bu duyğunш bölüşir», – dep bildire onıñ sözlerini «Birinci kanal».
Samoylova «Flame Is Burning» yırını taqdim etecek. Bu yırnı Leonid Gutkin, Netta Nimrodi ve Arye Burşteyn yazdılar.
Yuliya Samoylova 1989 senesi aprel 7-de Komi Cumhuriyetindeki Uhta şeerinde doğdı.
O, Alla Pugaçövanıñ «Faktor A» leyhasınıñ üçünci mevsiminde iştirak etkeninden soñ belli oldı. Yarış 2013 senesi fevral ayından aprelge qadar «Rossiya-1» kanalında keçirilgen edi. Yuliya ekinci yer, bunen beraber, «Alla Pugaçövanıñ yıldızını» aldı.
Yuliya birinci gruppa saqatı ola ve saqatlar içün arabaçıqnen balalıqtan yüre.
Avdetniñ evel bildirgenine köre, avropalı konkursta Ukrainanı «O.Torvald» rok gruppası «Time» yırınen temsil etecek.
Hatırlatamız ki, Kiyev, 2016 senesi Stokgolm şeerinde Jamala ğalebe qazanğan soñ, «Eurovision-2017» yarışını keçirmek aqqını aldı. Yarış finalı mayıs 13-te keçirilecektir.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
