Qırımda Yaltadaki «Skazka» ayvanat bağçası qapatıldı

16.03.201723:45

Mart 16-da Yaltada ükümet «Skazka» ayvanat bağçasını qapattı.

Bu aqta «Qırım.Aqiqatqa» ayvanat bağçasınıñ saibi, Qırım iş adamı Oleg Zubkov bildirdi.

«Bergi inspektsiyası söz bergeni kibi, olar mart 16-da Yaltadaki «Skazka» ayvanat bağçasını parkka biletlerde yetmegen malümat içün qapattı. Kerçek aytsam, soñuna qadar bunıñ olacağına inanmağan edim. Ayrıca ükümetniñ keskinligini qayd etmeli, bu, referendum olğan künü oldı, böyleliknen ükümet cemaat fikrine lâqaytlıqnen baqqanını köstere», – dep añlattı Zubkov.

İş adamınıñ sözlerine köre, ayvanat bağçasınıñ qapatıluvı – «Qırım ükümetiniñ onı battırma planıdır».

«Meni ta 2014 senesinden berli sevmegen Qırım ükümeti, olarnı tenqit etmege başlağanımda, bağçalarımnı yoq etmege qarar aldı. «Skazka» qapatıluvı – bu birinci adımdır. Bellesem, nevbetteki adım, «Taygan» arslan bağçasınıñ qapatıluvı olacaqtır. Esap böyledir: üç biñ ayvannı er kün aşatmaq kerek, kiriş ödevinden kelirler olmağan alda ise, yaqında batacam. Amma eñ evelâ men degil de, qabaatsız ayvanlar zarar körecek, qaysı birileri Qırım ükümetiniñ qabaatınen aç qalacaqtır», – dep qayd etti Oleg Zubkov.

Bundan evel o haber etti ki, mart ayında «Taygan» arslan bağçası ve Yaltalı «Skazka» ayvanat bağçasınıñ müflis oluv ceryanı başlanuvı aqqında ilân ete bile.

Avdetniñ bildirgenine köre, Oleg Zubkov İstanbul civarında dünyada eñ yahşı ayvanat bağçalarından birini açmağa planlaştıra.

Hatırlatamız ki, Oleg Zubkov Türkiye vatandaşlığını almaq içün vesiqalarnı berdi.

Bunen beraber o, Ukraina Yuqarı Radası deputatı, belli qırımtatar uquq qoruyıcısı ve dissidenti Mustafa Cemilevniñ Türkiye ükümet strukturasındaki bağlarını qullanmaq ve yardımını almaq azır olğanını ilân etken edi.

İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET